منبر الصوت العراقي غرفة جميع الاطياف العراقيه

منبر الصوت العراقي غرفة جميع الاطياف العراقيه


    حاجيني بَعَدْ ... يانكرَة السَلمانْ !!

    شاطر
    avatar
    menbar alsout al3ira8y
    المدير العام

    المساهمات : 637
    تاريخ التسجيل : 14/01/2010
    العمر : 45

    حاجيني بَعَدْ ... يانكرَة السَلمانْ !!

    مُساهمة  menbar alsout al3ira8y في السبت فبراير 13, 2010 11:49 pm

    أبو أحمد الحداد المسعودي

    جَمْ ألفْ إندفنْ لو تنحسبْ الأجسادْ ...... اوجَمْ عَينْ إنطفتْ وإنحركَتْ إبدُ خانْ !؟

    وجَم طفلْ إنخنكْ بَعمارهُمْ الوروُدْ..... وإعصابه التشدْ إحلوكْ .. للنسوانْ !؟

    حاجيني بَعَدْ ... يانكرَة السَلمانْ !؟

    مَحاكمنه غدَة كُلْ ليله عَلْ المَكشوفْ .... والظيم إنخبَز بشفافنه خجلانْ

    يعني الي دفنهُمْ بالمَحاكمْ جايْ .... وإسمَه إويه الجَريمه إملطخه إبعنوانْ

    بعثي إبرُتبته تنظيمه رُكعَه إوياه ..... رفيق إمن الصُغرْ ومدَكدَكْ .. إبنيشانْ

    إبكُلْ هاي العلايّم كابعه إتغطيه ..... ولاجَنهُمْ بشرْ .. حظ وبختْ هلكانْ

    حاجيني بَعَدْ ... يانكرَة السَلمانْ !؟

    منْ إبعيدْ عَيني وإذني عَلْ التلفازْ ..... وَأطنانْ السُوالفْ لبّسَتني أحزانْ

    طفتْ بيها إبخيا ليْ ورَدَتْ الأيامْ .....وَأزور آنه (الحفيرَه ) إجبيرَه بالكيعانْ

    شفتْ إسرابْ غاركْ بالرَمُلْ يبجيْ ..... وبْجُوله ا لتوَنوّنْ صُوتها إبأشجانْ

    يَعني الكُلْ شهيدْ آثارْ بالتربانْ .... صُوَرهُمْ بالصَحاري إنرسْمَتْ إبألوانْ

    حاجيني بَعَدْ ... يانكرَة السَلمانْ !؟



    وآلافْ الضحايه أكرادْ فيليينْ .... طمُوهُمْ ولاجَنهُم سُلاله إتعايشْ الإنسانْ !؟

    كُلْ رجلْ إبحَبلْ وصلوها حتى إتمُوتْ .... وبدَفعه الضَحايه إتغوصْ بالتربانْ !!

    عَدليينْ إبحفيرَه إتشوفهُمْ جُوكاتْ .... وإترابْ اليغطي أجسادهُمْ جُوعانْ

    عَله مُودْ الرئيسْ وزمرته إيعيشونْ ..... نتذبَحْ شعَبْ .. وإتشوفنه الجيرانْ !!

    عَله يا دينْ هالطاغيْ القتلْ هاالناسْ ..... كُلي إبيا شريعه ... إتشرّعْ الطغيانْ


    حاجيني بَعَدْ ... يانكرَة السَلمانْ !؟


    مُو كافي بَعَدْ ملينه إسم الخوفْ ... خلونه نعيشْ إبلا بَعثْ أحرار كُلْ إمجانْ

    والقاضي الحَكَمْ والقلمْ هُوَ السيفْ ..... والنصْ إبيَمينه ... إنطبَعْ بالقرآنْ

    ذاكْ إبنْ اللقيط الي إنحُكَمْ بعدامْ .... وذوله أولادْ هندْ وزمرة الشيطانْ

    كُلهُم فد سُلاله الشمر وإبنْ إزياد ْ...... وإبنْ مُلجَمْ أبُوهُمْ منْ إبنْ سُفيانْ




    أسَمْعّجْ وَأنتحبْ ... يانكرَة السَلمانْ !؟







    كُلْ جسم التفسخه الكاعْ يحجي إبرُوحْ ..... ويحَشمَكْ يبُو الغيرَه العَدلْ ميزانْ !

    بعظام الضحايه إنأرخ الي صارْ ..... او منْ دَمهُمْ حبر لقلامنه ولسانْ

    نطبعْ كُلْ صُورهُمْ عَلْ الرَمُلْ عَلْ الكاعْ .... او نحفظ ْ كُلْ إسم منهُمْ رمز شجعانْ

    ونسُولفْ مَجدهُمْ صَبُرْ عاش إدهورْ .... ونخلدْ ذكرهُمْ ... للزمَنْ عرفانْ


    أسَمْعّجْ وَأنتحبْ ... يانكرَة السَلمانْ !؟




    إنلحن النشيدْ إبوَنة المَجتولْ .... بَنغام القصيدَه إتلعْلعْ الشبانْ

    وَأصيحَنْ ياعراقْ إوياكْ تنبُض ْروحْ ..... وَأهتفْ لليّحبْ الوَطنْ صُوتي إوذانْ

    عراقي آنه ومُوالي وإسمي بالتاريخْ ..... بأطيافْ الوَطنْ تتعايشْ .. الخلانْ

    يهتفْ كُلْ وجودي المُوتْ للظلامْ ..... ونوَحّدْ شعبنه ( البعثْ ) ماله إمجانْ

    أسَمعجْ منتصرْ ... يانكرَة السَلمانْ !!


    تمت ولله الحمد
    هولنده
    كُتبتْ للمقابر الجَماعية في نكرة السَلمان المشؤومه !
    رحمَ اللهُ الشهداء الأبطال أبناء الشعب العراقي الأبي

      الوقت/التاريخ الآن هو السبت يوليو 21, 2018 9:17 pm