انت ظلمه

راح اعوفك مو لان دربك بعيد ولا تظن مليت من طول الدرب
اني گطعت السچچ واني بصباي ولا گلت فد يوم اه امن التعب
بس شفت كلك على بعضك سراب وما اظن عطشان من مايك شرب
انت چذبه مغلفة بثوب الخداع وانت منك يستحي حتى الچذب
انت ظلمه وليل ما عندك نهار انت عايش بس حسافه ابلا گلب
انت قاسي واقسى من زبر الحديد وعندك الناس ومشاعرهم لعب
حيرتني بيا لغة اتفاهم معاك وانت كل لحظة مزاجك ينگلب
انت مو جنه وتظن بيها النعيم انت نار واني صرت لها حطب
انت من تضحك ضحكتك كلها زور وابتساماتك غدت حيله ونصب
مملكة دنيا الك صارت مباح وانت حر اتعاشر وتهوى وتحب
كل ثلثتيام وي واحد جديد وهذه مو بدعة تراهي ولا ذنب
فرصة جتك والفرص مثل السحاب لاتضيعها وتظل تقره كتب
چنت اظنك عندك اخلاق وضمير بس ضميرك داخ من شاف الذهب
ما نفع وياك كلشي وكلشي ضاع واليموت احساسه شيفيده العتب
مو عجيبه اتبوگ بيتك من تحوف يجوز اعذرك والتمس مية سبب
بس عجيبه اتخلي بيتك مستباح وتطي مفتاحه ابرضاتك للغرب