معدنك فافون

ظل ابغرورك يالضميرك مات ما الومك بعد يفلان من تغتر
لان طبع اللئيم اعلى الشماتة ايعيش وعلى اجروح الضحية ايگوم يتبختر
ظنيتك اصيل وراضع امن النوگ رابي ويا الگصب والهور والعنبر
طلع ظني خيال وهم چنت غلطان غشاني الصبغ واللون والمظهر
صحيح انت انيق وبعدك اصغيرون بس لا مو صحيح اتگوم تتكبر
واذا نسبة جمالك وصلت 30 غيرك عبروا التسعين يمعثّر
مو يوسف تراك ولا صرت بلقيس ولا كلمن يمر اعليك يتبسمر
بس نزوة شباب ونزوتك طاغوت صارتلك صنم يغريك بالمنظر
لاتعبد جمالك لاتروح ابعيد واترد لهبل واللات لاتكفر
احذرك من غرورك لاتزل وتطيح گزازه انت رقيقه ابساع تتكسر
اني اللي عجنتك واعرف شما بيك بس المايعرفك زين خل يحذر
غلافك من ذهب بس معدنك فافون وچثيره ابلمعة الباكيت تتقشمر
لا تخفِ الحقيقة ابثوبك اللمّاع واضح والدجل مكشوف ما ظل سر
علاقاتك چثيرة وادري لك عشاگ بس كلهم نوو وياك نية شر
ما عدهم صراحة ولاصدگ وياك يعوفونك وحگ عيناك بس تعثر
على كيفك تهدّه ولاتبيع وياي بوزاتك تراك ابهاي هم تخسر
رد اعلى اوليتك وانعل الشيطان سمح كلش چنت حباب ومعتبر
شجاك اتخبلت تكشخ بدون اسباب شايل خشمك اعلى الناس من اتمر
چنت مثلك حلو بس ما بعت بوزات لان ادري الدهر چتال من يغدر
لان ادري الدهر چتال من يغدر