عنوان القصیده طیف للشاعر عباس العلاق

طيف))........

وانه نايم شفت طيف
شفت وردة بحضن سيف//
وشفت حالوبة جبيرة ماتت أعلة امتون صيف....
وشفت دمعة
تناغي شمعة
وصوت أسمعة
يصيح طيف....يصيح طيف
وفززت روحي بديه
وشفت روحي بلايه جسم أعلة الرصيف....
وكلت طيف..
شفت محروكة ظفيرة
ويمهه دم طفلة صغيرة
ويمهه شجره تشبه امي...ويمهه عش بلاية طيرة

وكلت طيف....

أسمعت صوت
يصيح موت...
....اسمعت صرخة بعالي حسهه
طاحت بوادي السكوت...
خرسه ما تحجي الحناجر
والحرف يكسر الخاطر
ضل يناطر...
بلكي كلمه أعله الشفايف تغلط ومرة تفوت...
وماكو صوت...
بس خيوط العنكبوت
النسجت من الذل چفن
موته نمشي بلا دفن..

............وكلت طيف....

شفت جثة بلا ملامح
ومن بعيد اسمع الصايح
ناس تركض مدري وين
هذا راجع
ذاك رايح
ودنكت عالجثة خايف
واسمعت همس الشفايف
ولنه صوتي
ولنهه جثتي
وكلت طيف وما هي جثتي...
وما هو صوتي
انه حي
وشلون موتي
وفجأ فزيت اعله صوتي
وثاري طيف
وثاري سيف
وثاري صيف

وراح اضل اعله الرصيف....!!!!!!!



للشاعر عباس العلاق